Konversacioj pri la Nicea Simbolo

-A +A
Fako: 

Ni republikigas en nia retejo tri Konversaciojn pri la Nicea Simbolo, kies aŭtoro estas la konata rusa pastro Aleksandr Menj, kiu dum sovetia tempo aktive lekciis pri la kristanismo inter homoj, kiuj vivis en la ateisma medio. Tial liaj konversacioj estas skribitaj per simpla stilo, li uzis kompreneblajn por ĉiuj ekzemplojn kaj faktojn.

Patro Aleksandr naskiĝis 1935 en Moskvo, en hebrea familio. Lia patrino Helena ekde juneco interesiĝis pri la kristanismo. Kiam Aleksandr aĝis 6 monatojn, ŝi sekrete baptiĝis mem kaj baptis ankaŭ sian filon. Lia patro estis arestita de NKVD en 1941 kaj poste ekzilita al Uralo.

Kiam Aleksandr estis forpelita el instituto pro la religia konvinkiĝo, li studentiĝis en la Leningrada seminario kaj baldaŭ fariĝis diakono kaj en 1960 - pastro. En 1965 li koresponde finis la Moskvan teologian akademion.

Patro Aleksandr estas kruele murdita la 9an de septembro 1990.

Rilato al liaj verkoj inter la ortodoksaj kristanoj estas diversa. Kelkaj liaj ideoj povas ŝajni ne tre ortodoksaj, tamen en la proponataj ĉi tie Konversacioj ni trovis nenion serioze herezan.

Ĉi tiu traduko estis publikigita en la pola katolika revuo "Frateco" en 1998. La konversaciojn tradukis el la rusa pastro-monaĥo Taŭriono (Smykov), kiu tiutempe havis la nomon Ilija.

Bedaŭrinde, estas tradukitaj nur tri konversacioj el sep, tamen ankaŭ ili estas ne malinteresaj.

La Simbolon mem, pri kiu temas ĉi tiuj Konversacioj, vi povas trovi en nia retejo sur aparta paĝo.

Tradukinto: